Äs hed ubergrääwwd ghäben; da wän äina gägem stäinigen Eggelti ggangen. Im Schnee ischd es Gspoor gsiin wee vun arra Gäis. As sii Tritta gsiin vum Gäismäitli.

A Chääserstatt häi rra ds Gäismäitli o gseen. I Fäldhublen isch'sch uf enem Hubelti gsässen und hed ds Haar gfträäld.

Äs gäid mengsmal allem Alpbach naa abhi bis i d'Schnägge-w- wäid; aber den gid's läids Wätter.

Äs ischd äina gäge Schlafbeelen hinderhi. In Nellen ob em Wäg ischd es Mäitli gsiin; altvätrisches Gwand hed's aghäben, und äs wä gsiin, as wes z'Gsteli wän. Är hed im bbreeled, ob er im selli hälfen. Döö hed's taa-w-wee wild ung glached; äs ischd ds Gäismäitli gsiin.

En Haslibärger hed uf dr Schiirwittri es Bäichelli dartaan. Ds Gäismäitli hed das erseen und ischd all Tag uf dee Wittri chun; den isch'sch uf das Bäichelli gen hocken und hed ds Haar gsträäld.

Döö häim Bööben ds Bäichelli furtgschrissen; aber am Tag derna ischd ds Bäichelli umhi dar gsiin.

Undrem Loibstock ischd es Gööd, am Beel säid ma-m-ma. Äs stäid e Schiir drüüf und es Wäidhüüsli. Äis sii s' mid dem Vee da gsiin. D'Chääsmilch häi si in enem Bittelli im Chuchelli ghäben. Döö ischd äis us em Wald abha ds Gäismäitli chun; äs ischd bim Hüüsli zööhi ggangen, ischd i ds Chuchelli inhi, hed us em Bittelli Chääsmilch trüühen und trüühen und ischd derna umhi gäg em Wald embrüüf ggangen.

Rüüggitriini hed gsäid, we's es Gäismäitli gäbi, häigi äs ses am Gwärtler gseen. As siigi an arra Fure ghocked und häigi e wiissi Schniggellen mid schwarze Tupfe ghäben. Das hed's gööd chennen gän; näin, göss, äs ischd nid alls Trug, was ma gseed.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.