D'r alt Gläusler, der het de-n-alligs z'Gufärä-n-im Maderanertal grad da underem Hotäll unnä g'sännet, und de hed'r-si scho mängisch verredt: »Wenn-i-ds nechst Jahr nu einisch z'Alp gah, sä cham-mi d'r Tyfel nä!« Aber so hennt's d'Älpler; wennd-si-si scho alli Jahr verredet, si gahet nimmä z'Alp, sä miënt-si doch glych wider gah, si hennt's ganz im Blüet. D'r Gläusler hed de-n-aber doch nu gnüeg iberchu! Eis Summers am erschtä-n-Abed, wo-s' üffg'fahrä gsy sind, hed-er wië gwohnt wellä ga z'bättä riëffä. Aber dassälb Mal isch-er eiswägs wider chu! Äs hed-ä doch gar nitt wellä la z'bättä riëffä. Bis zur Hittä het's-ä b'bracht, und dur d'Tirä-n-innä isch er g'heerig z'flygädä chu. Vo da a isch düä d'r Hirt ga z'bättä riëffä; de hed-er de-n-alligs miëssä dur-nes Tirli durä, und wenn-er alligs eppä z'rugglüegt het, sä hed-er doch jedes Mal ä Brandschwarzä g'seh stah bi dem Tirli. Der wär da g'grächädä g'sy! Besser isch es g'sy fir-ä Gläusler, är syg nimmä ga z'bättä riëffä, dersälb Schwarz da! i gläubä, der hätt-em de d'r Muggis g'ha! Ds nechst Jahr isch-er düä nimmä z'Alp.

Josef Jauch, Silenen

Quelle: Müller, Josef: Sagen aus Uri 1-3. Bd. 1-2 ed. Hanns Bächtold-Stäubli; Bd. 3 ed. Robert Wildhaber. Basel: G. Krebs, 1926, 1929, 1945

Eingelesen von der Mutabor Märchenstiftung auf www.maerchenstiftung.ch.