Von einem kindlich frommen Gauben zeugt die folgende Erzählung, die wohl als das Erlebnis eines Traumes zu werten ist:

Dr Tüfel isch gli parat

Dr Bur im Bolehüsli isch e Schnapser gsi u derzue en Uflot bis a Hag use. ’s Fraueli het für ihn to, was es chönne het; aber das lsch für nüt gsi.

Einisch het er ume si Stör gha. ’s Fraueli isch bim Tisch ghocket u het i dr Bible gläse. Drufache isch er i d’Stube cho, het to wie-n-es Unghüür un ihm d’Bible in en Egge triebe.

’s Fraueli isch gflohe u het gjammeret: „Das het e ke Gattig meh u das het’s nid, u we’s e Gott git, lot er das nid ungroche.“ Bilängerschi meh isch es in es Züg ihecho; dr Uglaube het ihn’s wellen übernäh‘; äs het jo müesse dänke, läsen u bäte trag nüt meh ab. Dä Obe ischh es i ’s hinger Stübli; do isch es Ruehbett gsi. Äs het e Wulldechi gno u het do welle ligge. Aber e kes Aug voll het es chönne schlofe. Äs het ume mit em Uglaube afo schlo u gchummeret u pläret u niene ke Hülf gseh.

Eismols zupft öppis a dr Wulldechi; äs hocket uf, für z’luege‚ was es sig. Du isch es chlis, chlis Manndli bi dr Fuessete gstange; schwarzes isch es gsi, wie ne Chemifäger, u gruesselet u bränntelet het’s wie ire Rauchchuchi.

’s Fraueli het im Augeblick gwüsst, woruber. Eis Bätt nom angere nimmt es füre un ei Bibelspruch nom angere seit es uf. Drufache isch das schwarze Manndli süferli furt; mit eme Satz isch es uf em Egge vo dr Ofeblatte gsi; mit de Geissfüessline het’s afo tanze un isch gäng gwiche u gäng gfloh u eismols nümm meh do gsi.

M. Sooder, Sagen aus Rohrbach, Huttwil 1929

 

Eingelesen von der Mutabor Märchenstiftung auf www.maerchenstiftung.ch.