Äis ischd en Ätti gsiin und em Möetter, und die häin es Mäitelli und es Böebelli ghäben. Äis es Tags hed d'Möetter ze Chinde gsäid, si selle d'Huttleni nän ung gen holzen. Das, wa mee Holz häimbringi, chenni i d'Loiben und im Chaschten en Epfel räichen. Si sii ggangen und emumhi chun, und ds Böebelli hed mee Holz ghäben.

Döe ischd d'Möetter schabab gsiin ung gruwwni und hed dem Böebelli den Epfel vergennd. Si ischd im naadäässelled, über d'Loibestägen üf, über e Loibengang hinderhi um bis i d'Loiben. Wa ds Böebelli uber e Chaschten inhighanged ischd, hed si de Dechel zöegrierrd und im ds Hoitelli ab. E seli niidraazegi Möetter ischd das gsiin!

Und derna hed si ds Böebelli gchoched. Ds Hoitelli hed si in en hola Stock taan. Und ds Mäitelli hed dem Ätti miesse ds Ässe träägen, wiit üüsi i-w-Wald, wan er am Holz ischd gsiin. Döe isch'sch Üüstage-w-worden. Äis es Tags ischd us em hole Stock e Guggüüser chu z'fläigen ung grad uf ds Hüüsdach und hed afam brielen:

„Hühü, hühü!

Mäitelli, chun äis üüsa!"

Ds Mäitelli hed das gheerd und ischd üüsi näbe ds Hüüs gsprungen. Döe hed er im en guldaga Girben abhagrierrd. Döe hed er umhi bbrieled:

„Hühü, hühü!

Möetter, chun äis üüsa!"

Döe isch d' Möetter o chun und hed dä Vogel welle gseen, und döe hed er rra gad e Stäin uf ds Hoit ghiid, das si uf em Boden ischd gstitzd und tooti gsiin. Däich äis!

Die zwei ersten Fassungen (Vom Maitelli und vom Böebelli, Ds Märi vun dr beesem Möetter) stammen aus Brienzwiler; vom Liirlüüserli erzählte ein Greis auf dem Hasliberg. Alle drei Varianten (wissen fast nur von Untat und Rache zu sagen. Von dem echt märchenhaften Ausgang, dem Lebendigwerden des Knaben, wie das Grimmsche Märchen „Von dem Machandelboom" erzählt, vermögen sie nicht zu berichten.

Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.

Eingelesen von der Mutabor Märchenstiftung auf www.maerchenstiftung.ch.