Äis wän em Bööb gsiin und es Mäitli und es Siwwli. Dr Bööb hed Niggelli ghäissen. Und i truwwem ma, es Hundelti wän o no gsiin. I cha 's nimmä rächt sägen.
Niggelli hed ds Siwwli i ds Achrand triben. Döö wä 's döö newwa Ziid gsiin, fir häi z'gaan. Aber dem Färli wän döö ds Achrand eso gööd gsiin, das es si gwidriged und nid drus wellen hed. Da siin eso Riimleni gsiin wee bim Hanelli und Hennelli. Äs ischd geng furt und furt ggangen, von äim zem andren und den umhi emzrugg. Niggelli hed döö selle ds Färli schlaan, fir häi z'faaren.
Niggelli selli ds Siwwli schlaan.
Niggelli wolld nid ds Siwwli schlaan.
Ds Siwwli wolld nid us em Achrand gaan.
Ietz hätti ds Hundelli Niggellin sellem biissen.
Hundelli selli Niggellim biissen.
Hundelli wolld nid Niggellim biissen.
Niggelli wolld nid ds Färli schlaan.
Ds Färli wolld nid us em Achrand gaan.
Döö ischd es Chnebelti da gsiin und hätti ds Hundelli selle schlaan.
Chnebelti wolld nid Hundelli schlaan,
Hundelli wolld nid Niggellim biissen,
Niggelli wolld nid ds Färli schlaan,
Ds Färli wolld nid us em Achrand gaan.
Döö ischd ds Fiirli chun; das hätti selle ds Chnebelti brennen. Aber das isch uwwilligs gsiin:
Fiirli wolld nid Chnebelti brennen,
Chnebelti wolld nid Hundelli schlaan,
Hundelli wolld nid Niggellim biissen,
Niggelli wolld nid ds Färli schlaan,
Ds Färli wolld nid us em Achrand gaan.
Döö hätti döö ds Bächli selle ds Fiirli leschen. Aber das hed si o gwidriged.
Ds Bächli wolld nid ds Fiirli leschen,
Ds Fiirli wolld nid ds Chnebelti brennen,
Ds Chnebelti wolld nid ds Hundelli schlaan,
Ds Hundelli wolld nid Niggellim biissen,
Niggelli wolld nid ds Färli schlaan,
Ds Färli wolld nid us em Achrand gaan.
Döö ischd ds Chälbelli chun und hätti selle ds Bächli triihen.
Chälbelli wolld nid Bächli triihen,
Bächli wolld nid Fiirli leschen,
Fiirli wolld nid Chnebelti brennen,
Chnebelti wolld nid Hundelli schlaan,
Hundelli wolld nid Niggellim biissen,
Niggelli wolld nid ds Färli schlaan,
Ds Färli wolld nid us em Achrand gaan.
Döö ischd dr Metzger chun und hed ds Chälbelli wellem metzgen. Und jetz gäid alls emzrugg:
Chälbelli wolld jetz Bächli triihen,
Bächli wolld jetz Fiirli leschen,
Fiirli wolld jetz Chnebelti brennen,
Chnebelti wolld jetz Hundelli schlaan,
Hundelli wolld jetz Niggellim biissen,
Niggelli wolld jetz Färli schlaan,
Färli wolld jetz us em Achrand gaan.
Melchior Sooder: Zelleni us em Haslital. Märchen, Sagen und Schwänke der Hasler aus mündlicher Überlieferung. Basel 1943.
Eingelesen von der Mutabor Märchenstiftung auf www.maerchenstiftung.ch.